«Nikasa hisongona moto iray teo alohany, nifampikasoka tampoka ny moto ka nifatratra tany ambany kamiao ireo olona roa nitaingina scooter», hoy ny fanazavan’ny kaomandin’ny zana-tobim-paritra Carion, omaly maraina. Niainga avy any Manjakandriana ireo olona roa tra-doza ireo, araka ny loharanom-baovao. Hiditra fiolahana teo amin’ ny toerana atao hoe Ambatokely, kaominina Ambanitsena, PK25+950, anatin’ny lalam-pirenena faharoa no nitranga tampoka ny loza. «Nentin’ilay tovolahy tamin’ny moto ilay raim-pianakaviana», hoy ny zandary misahana ny famotorana. Tsy tafarin’ity tovolahy namily ity intsony ny moto nentiny. Nisosa avy hatrany tao ambanin’ny kamiao nifanoha-dalana taminy. «Notetezin’ny kodiarana aorian’ilay kamiao ireo tra-doza», araka ny fanamafisan’ny zandary miasa ao an-toerana. Notanana natao famotorana ny mpamilin’ny kamiao. «Tsy nijanona ilay nitondra moto nifampikasoka tamin’ireo olona namoy ny ainy ireo», hoy hatrany ny zandary. Karohin’ny mpitandro filaminana anefa izy ireo manoloana ny voina niseho. Tsiahivina fa mpianaka nitaingina moto niara-matin’ny lozam-pifamoivoizana tao Ilempona, RN7, ny tolakandron’ny alahady lasa teo. Saika ho isan’andro ny lozam-pifamoivoizana mitranga eny amin’ny lalam-pirenena, tao anatin’ny herinandro izay. Miafara hatrany amin’ny faty olona izany ka mila mailo ny tsirairay, indrindra ireo mpampiasa lalana.
Tsiferana R.
French