Tovovavy 17 taona sy 21 taona hita faty teny Ambohimanga Rova, omaly. Novonoina tamin’ny alalan’ny zava-maranitra avokoa izy ireo.
Vatana mangatsiaka, an’i Stephanie sy Haingotiana, no hany sisa hitan’ny fianakaviany tao Andranomatsatso, kaominina Ambohimanga Rova, omaly. «Voarasa antsy teo amin’ny tendany i Stephanie ary tsatoka zava-maranitra indimy no hita teo amin’ny tendan’i Haingotiana», hoy ny fanazavan’i Rado Ambinintsoa, zaodahin’i Stephanie. Nanomboka tsy hita ireo roa vavy ireo ny marain’ny zoma 21 aogositra lasa teo. Niezaka niantso tamin’ny alalan’ny finday ny fianakaviany saingy tsy nisy tratra antso izy roa vavy. «Nametraka fitarainana teny anivon’ ny mpitandro filaminana izahay solontenan’ny fianakaviana ny sabotsy teo», hoy ny fianakaviany. Niroso tamin’ny fampahafantarana tamin’ny alalan’ny tambajotran-tserasera ihany koa izy ireo. Samy nivoaka ny trano hikaroka azy mirahavavy ny fianakaviany, omaly. «Toerana nahitana azy ireo farany ny manodidina an’ Ambohimanga Rova rehefa narahin’ny mpitandro filaminana ny findain’ireo olona karohina», araka ny fanazavana.
Tsy nisy aina intsony
Nidina ifotony teny amin’ ny toerana voatondro ho nampiasan’izy roa vavy farany ny findainy ireo fianakaviany. Hita, saingy efa tsy nisy aina intsony ireo olona nokarohina. Voamarina fa niharan’ny herisetra ara-nofo ny iray tamin’ izy roa vavy lasibatra. Velon-taraina manoloana ny zava-misy ny fianakavian’ireto farany manoloana ity vonoan’ olona mahatsiravina ity. Tsy nahazoam-baovao kosa ny mpitandro filaminana misahana ny raharaha. «Hiezaka hamantatra sy hampita ny zava-misy izahay», hoy ny tomponandraikitry ny zandary nantsoina an-telafaonina omaly tolakandro. Anatin’ny fanadihadiana, araka izany, izy ireo. Andrasana ny tohin’ ity raharaha ity.
Tsiferana R.
French