Hampitombo ny vokatra anatiny sy ny fanodinana eto an-toerana. Ireo no vina apetraky ny fanjakana amin’ny fampifandraisana ny sehatry ny fambolena sy ny fiompiana amin’ny indostria. Nisongadina izany nandritra ny “Atsimo Andrefana Business week” izay natao tao amin’ny Jardin de la mer, Toliara, ny alakamisy teo. “Tokony hifamatotra bebe kokoa ny famokarana eny ifotony sy ny indostria”, hoy ny minisitry ny Indostria sy ny fampivelarana ny sehatra tsy miankina, Raharimanjato Ny Riana Nampoina, tamin’ny famelabelaran-kevitra nataony. Vina apetraky ny fanajakana, hoy izy, ny hampiakatra ny sanda fanampiny amin’ny fampitomboana ny vokatra anatiny, hamorona asa sy hampiroborobo ny indostria eto an-toerana. Ankilany, mila rojom-pihariana matanjaka ny sehatra mba hahafahan’ny vokatra eto an-toerana mamaly ny filan’ny tsena. Manana tombony ny faritra Atsimo Andrefana amin’ ireo vokatra ananany, toy ny katsaka, legioma maina, hena, ronona ary menaka izay azo ahodina eto an-toerana sy afaka ampitomboina sanda ara-toekarena. Miteraka asa sy tombontsoa ho an’ny mpamokatra sy ny orinasa malagasy izany.
Fitaovana
Anisan’ireo rafitra manohana ny vinam-panjakana ny tetikasa maro iarahany amin’ ny mpiara-miombon’antoka
sy mpampiasa vola eto an-toerana sy any ivelany.
Ho an’ny faritra Atsimo Andrefana, tanjona ny hamokatra, hanodina ary hitondra sanda fanampiny eto an-toerana. Kendrena ao anatin’ izany ny hanatrarana ny fahaleovantena ara-tsakafo sy
ara-indostrialy ho an’i Madagasikara. Hanamafy koa ny fahafahan’ny faritra misarika mpampiasa vola.
Henintsoa
French