Tsy mitsahatra mihena ny velaran-tany ambolen’ny tantsaha ny orge any Ambatofinandrahana, noho ny tsy fahafahan’ny mpandray ny vokatra mividy azy. Manampy trotraka ny fiantraikan’ny fiovan’ny toetr’andro.
Kivy ny tantsaha toa an-dRazafimahatratra Florent, mpamboly orge any Ambatomainty, fokontany Vinany, distrika Ambatofinandrahana. Nambarany fa : «tena loharanom-bola iankinan’ny ankohonana mihitsy ny fambolena ity zavamaniry ity, fa tsy asa fivelomana fotsiny». Akora fototra amin’ny fanamboarana zava-pisotro labiera ny orge. Nanamafy izany Razafimaharo Anjarasoa fa : «misy fiantraikany mivantana amin’ny fiainanay tantsaha sy ny hoavinay ny fitotongan’ity sehatra ity».
Namboly orge nanomboka ny taona 1996 ny tantsaha any Ambatofinandrahana. Nihena ho 414 ha sisa ny velaran-tany ambolena, ankehitriny, raha nahatratra 600 ha tamin’ny taona 2025. Toraka izany koa ny mpamboly, nidina ho 3 790 ny isan’izy ireo amin’izao taona 2026 izao, raha 4 852 tamin’ny taon-dasa.
Nilaza Razafimaharo Anjarasoa fa mihena ny vola miditra rehefa mihena ny velaran-tany ambolena. Mitotongana ny fari-piainana. Ho azy manokana, voafetra ny velaran-tany ambolena orge, raha efa namboly tamin’ny 50 ara izy taloha.
Fiovan’ny toetr’andro
Nohazavain’ireo tantsaha ireo fa manampy trotraka, miantraika amin’ny fiharian’izy ireo koa ny fiovan’ny toetr’andro, amin’izao fotoana izao. Mananosarotra amin’ny famokarana ny tsy fahampian’ny orana. Eo koa ny hafanana tafahoatra sy ny tsy fahampian’ny rano.
Very hevitra ireo tantsaha. Nangatahan-dRamatoa Rafenomanana Velonatalo Florette ny hijeren’ny fitondram-panjakana akaiky sy haingana ity zavatra manjo ny tantsaha ity, satria tena potika ny fiharian’izy ireo. Eo koa ny tokony hiarovana ny seha-pihariana orge, miantraika mivantana amin’ny mpamokatra, ny toekarena eny ifotony sy eto amin’ny firenena.
Njaka
Andriantefiarinesy
French