“Fitiavan-tanindrazana miaraka amin’ny fiarahamonina tan-dalàna sy mifanaja no ezaka mafy ataonay izao”. Io ny nambaran’ny filohan’ny Fanavaozana ny Repoblika, ny kolonely Randrianirina Michaël, nandray ireo Malagasy mpianatra vitsivitsy tany Antalya, Torikia, namaranany ny dian’ny delegasiona notarihiny tany an-toerana tamin’ny fiatrehana ny fihaonambe iraisam-pirenena momba ny Fiovan’ny toetr’andro (COP 31), afakomaly. Nohamafisiny fa tena mbola mila fahatongavan-tsaina iombonana ny Malagasy. Izay no fototry ny fampandrosoana ny firenena, indrindra amin’izao fiatrehana ny fiovana sy fanavaozana izao.
Fanirian’ireo mpianatra ny hisian’ny masoivoho malagasy any Torkia. Mba hisian’ ny rafitra ara-panjakana afa-kikarakara azy ireo izany. Miankina tanteraka amin’ny fivoaran’ny fifandraisan’ny firenena roa tonta no hahazoana manokatra masoivoho, araka ny fanazavan’ny filohan’ny Fanavaozana. Ho hita eo ny momba an’izay, fa volabe ny fanokafana sy fampandehanana masoivoho iray. Ankoatra izany, nisy ny fanoloran-tenan’ireo mpianatra hitondra anjara biriky amin’ny fampandrosoana ny tanindrazana. Voalaza fa nahazo fanabeazana sy fampianarana manokana dieny mbola kely ireo olom-pirenena torika. Amin’ny fanarahan-dalàna sy fitsipika izany. Tsy mahagaga raha mankato lalàna amam-pitsipika ny rehetra, izay hita mazava fa fototry ny filaminan’ny fiarahamonina any an-toerana. Irian’izy ireo ny hitondra traikefa momba izany aty Madagasikara.
Taorian’izay, nandray ny Praiminisitr’i Rwanda, i Julien Nsengiyumva, ny filohan’ny Fanavaozana. Nifantohan’ny dinika tamin’ny fihaonana ny fanamafisana ny fifandraisana sy ny fiaraha-miasa eo amin’ ny firenena roa tonta, indrindra eo amin’ny sehatry toekarena sy ny varotra.
R. Nd.
French