Nitondra fanazavana manoloana ireo fanesorana tomponandraikitra sy mpitantana sasany eto amin’ny firenena tato ho ato ny filoha Rajoelina Andry, omaly, teny Anosizato. Mazava ny nambarany tamin’ izany.
Tsy niolaka fa nahitsy ny lahateniny, manoloana ny raharaham-pirenena sy ny fitantanana. “Hohafainganintsika ny “vitesse”-ny TGV. Solointsika ireo matoritory sy “midorodoro” na tsy miasa. Ireo vonona no miaraka amintsika amin’izao fotoana izao”, hoy ny filohan’ny Repoblika, tamin’ny fitokanana ny “Jirama Shop”, teny an-toerana. Nanteriny fa fotokevitra sy filozofia amin’ny lalana izorana amin’ny fitantanana ny firenena izany. Na izany aza, notsindriny fa tsy midika ho tsy fahaizana na tsy fitiavana ny nanesorana na nanoloana ny sasany amin’ireo tompon’ andraikitra sasany.
Niala tsiny amin’ny fihavanana ny filoha
Ilaina ireo maharaka ny hafainganam-pandehan’ny TGV fa tsy ireo matoritory. “Miala tsiny amin’ny fihavanana fa tsy mety amintsika izany. Tafiditra amin’ny fanovana sy ny fomba fiasantsika izany”, hoy ihany izy.
Nitodika amin’ireo solombavambahoaka tonga teny an-toerana ny tenany : ny depiote isany Ratsivahiny Andry sy Rahasimanana Paul Bert “Rossy” ka nilaza fa ilaina ny fiaraha-miasa, indrindra amin’ ny fijerena ny vahoaka. Eo koa ny ho fiantraikan’ny asan’ ny fitondram-panjakana amin’ ny vahoaka eny ifotony, araka ny nambarany.
Synèse R.
French