Afaka ny tahotra sy ny tebitebin’ny mpilalao tsipy kanetibe malagasy. Nofoanan’ny federasiona iraisam-pirenena (FIJP), ny sazy nomena an’i Madagasikara. Ny sabotsy lasa teo, nandritra ny fivoriambe nataon’ny federasiona malagasy (FSBM), natao tao amin’ny ANS Ampefiloha, nanambaran’Andrialemirovason Amiroudine, filohany fa nandefa taratasy manafaka izany, ity rafitra misahana ny tsipy kanetibe maneran-tany ity. Araka izany, miverina ao anatin’ny sehatra iraisam-pirenena indray ny tsipy kanetibe malagasy. Tsy misy fisalasalana intsony ny fandraisan’i Madagasikara anjara amin’ny lalaon’ny Nosy (JIOI 2023), hatao eto Madagasikara ary hiatrika ny fiadiana ny ho tompondaka eran-tany hotontosaina any Benin, ihany koa ho an’ny “senior”, olon-telo miaraka lehilahy sy olon-droa vehivavy, ny volana septambra. Eo koa ny ho tompondaka eran-tany any Thaillande, ho an’ny olon-telo miaraka vehivavy sy ny tanora ny volana novambra, ho avy izao.
Na izany aza, mbola nametraka fepetra ny federasiona iraisam-pirenena, mba tsy hisy mpilalao hijanona any Frantsa intsony rehefa miatrika fifaninanana any ny ekipa malagasy. Anisan’ny nanampy ny federasiona nahazoana izao, fahafahan-tsazy izao ny Komity olympika Malagasy sy ny minisiteran’ny Fanatanjahantena. Misy ihany koa ny tsy fahafahan’ny Malagasy miara-miasa amin’ireo fikambanana sasany any ivelany.
Farany, nahazo fankatoavana “quitus” avy amin’ireo ligim-paritra, ny komity mpitantana eo anivon’ny federasiona malagasy.
Torcelin
French