Tafiditra ao anatin’ny fanamarihana ny faha-50 taona nijoroany. Hanatanteraka antsa Paska ny antokompihira Orimbato ao amin’ny FJKM Tranovato Ambatonakanga.
Ao anatin’ny jobily volamenan’ny Chorale Orimbato, hanolotra ny Amboarankira Paska ho fankalazana ny Paska 2023 izy ireo. Fampisehoana nosalorana ny lohateny « Hery iray ». Nankinina amin’ny Soratra Masina araka ny 2 Korintiana 12 :9b : « fa ny heriko dia tanterahina amin’ny fahalemena ». Hotanterahina ny alahady 9 avrily izao, manomboka amin’ny 3 ora sy sasany tolakandro, ao amin’ny FJKM Tranovato Ambatonakanga.
Hizara roa ny fandaharam-potoana. Tapany voalohany, handrenesana ireo hira Paska voafantina noforonina ho an’ny antoko mpihira. Anisan’izany ny « Maty Jesosy » (R. Harkness), « Ranomaso » (Hiary Rapanoelina AVM), « Tafatsangana tokoa » (Andriamiadamahatratra)… Fizarana, hanandratan’ny Orimbato ireo hira notsongaina avy tamin’ny fihiranam-piangonana samihafa. Natokana hizarana ny herin’ny fitiavan’ Andriamanitra izay mitondra fampihavanana sy fiainana satria resy ny fahafatesana. Anisan’izany ny « Lazao lay tantaran’ny Vonjy » (Fihirana Advantista), « Misaotra Anao Jesoa Hôstia » (Fihirana Katolika), « Mamy ny fitianao » (Fihirana Anglikana), ary hira nalaina tamin’ny fihirana Protestanta FFPM toy ny « He manda fiarovana » (FLM) sy « Tamin’ ny andro voalohany » (FJKM).
« Fampisehoana « Hery iray », anisan’ny fomba hanehoan’ny Orimbato fa iray ny fianakavian’ny mpino kristiana. Araka izany, fotoana iray hanehoana fampiraisana ity Amboarankira Paska ity ka anasana am-pitiavana ny rehetra hiaraka hidera an’Andriamanitra noho ny heriny namonjeny antsika olombelona », hoy Jacques Ramanamirija, miandraikitra ny seraseran’ny antoko mpihira Orimbato.
Hira efatra ambiny folo no mandrafitra ity seho tarihin’i Fabrice Razafimamonjy ity. Hitendry ny zavamaneno, i Tsiresy Rajaonarifetra . Tsy misy vidim-pidirana, raha ny fanazavan’ny tomponandraikitry ny serasera.
HaRy Razafindrakoto
French