Niharan-doza ny taksiborosy nitondra mpianatra avy amina oniversite tsy miankina iray eto an-dRenivohitra, teo amin’ny tetezana hidirana an’ Andranofasika, anatin’ny RN4, PK 451 +600, ny alin’ ny sabotsy 15 avrily teo. Vaky ny kodiaran’ny fiara rehefa nihodina ny fiolanana mihazo an’Antananarivo izy ireo. « Nitsefotra ny kodiarana havanana », hoy ny nambaran’ny zandary nanao ny fanadihadiana. Nanarina izany ny mpamily kinanjo nilatsaka tany anaty rano avy hatrany ny fiara. Nivoaka ireo mpianatra ka fito ireo nisy fanaintainana. “Ny efatra tamin’izy ireo no tena nahitana ratra”, hoy hatrany ny zandary. Etsy ankilany, nanamafy ny tomponandraikitra eo anivon’io sekoly io fa anatin’ny fanadihadiana marina nahatonga ny loza izy ireo. « Vao manao ny angom-baovao avy amin’ny mpampianatra tomponandraikitra nitondra ireo mpianatra izahay », hoy ny sekretera jeneralin’io oniversite tsy miankina io. Hisorohana ny loza tahaka ity kosa, tokony hampiana famantarana manokana satria efa matetika hitrangan’ ny loza io toerana io, raha ny fanamafisan’ny zandary miasa ao an-toerana.
Tsiferana R.
French