Naiditra am-ponja vonjimaika eny Antanimora, afakomaly, ilay jiolahy saika matin’ny fitsaram-bahoaka teny Fenoarivo. Ny alahady 1 oktobra 2023 lasa teo, niharan’ny fanafihan-jiolahy ny fianakaviana iray avy nanao famadihan-drazana teny Fidasiana Antsahadinta Androhibe. Jiolahy efatra no tompon’antoka tamin’ny fanafihana. Ireo vola (aterokalao) azo tamin’ny tsodrano no saika halain’ireo olon-dratsy tamin’io fotoana io. Tsy tanteraka anefa ny fikasan-dratsin’ireo jiolahy satria nisy olona afaka niantso zandary tamin’io fotoana io. Fotoana fohy taorian’izay, tonga ny zandary notarihin’ny kaomandin’ny tobim-paritry ny zandarimaria (CB) ao Fenoarivo. Nanampy tosika koa ny zandary avy ao Antanety II Vontovorona sy ny avy ao Ampahitrosy. Tafaporitsaka ireo malaso tamin’ny fotoana nahatongavan’ny zandary. Nanao fanarahan-dia nanenjika ireo jiolahy ny zandary nampian’ny fokonolona. Tsy lasa lavitra anefa, azo sambo-belona ny iray tamin’ireo olon-dratsy ka niharan’ny fitsaram-bahoaka avy hatrany. Samy nitsaingoka nanala ny hatezerany taminy avokoa ny fokonolona. Naratra mafy izy saingy voasoroky ny zandary ihany izany fitsaram-bahoaka izany. Nahitana tsipoapoaka fampiasany rehefa manao ny asa ratsiny tany aminy nandritra ny fisavana nataon’ny zandary. Nilaza izy fa entiny hampitahorana ireo olona hanaovana ny asa ratsy ireto tsipoapoaka ireto. Natolotra ny fampanoavana izy taorian’izay ka niafara tamin’ny fampidirana am-ponja.
J.C
French