Andro vitsy tsy hanombohan’ny fifaninanana “World Jiu-jitsu Championship” hatao any Abu Dhabi, efa nahavita fisoratana anarana avokoa ireo Malagasy mpikatroka 13 mianadahy hifaninana amin’izany. Hiditra amin’ny fanaovana ny Visa kosa izy ireo amin’ity herinandro ity. Nambaran’ ny teo anivon’ny federasiona malagasin’ny Jiu-jitsu anefa fa mbola sarotra ny hoenti-manana amin’ity fifaninanana ity, ka izany indrindra no nahatonga ny teo anivon’ny federasiona, nanao antso ho fanampiana. Ny faran’ny herinandro teo, nanolotra taratasim-bola mitentina 3 tapitrisa Ariary ny groupe Refrigepeches-Sopromer, hoentina hanohanana ny ekipam-pirenena. Tetsy amin’ny Dojo Esca ny nanolorana izany. Ankoatra izay, miantoka ny fampikotranana ireo Malagasy mpikatroka mandrafitra ny ekipam-pirenena ireo koa ny Planète sport, izay nitondran’ny federasiona fisaorana. Mbola manao antso izy ireo ho an’izay maniry ny hanampy amin’ny lafiny rehetra ny ekipam-pirenena. Tsiahivina, sokajy efatra no hifaninanana amin’ity, dia ny “pro”, ny “Master”, ny “jeunes” ary ny “amateurs”. Sambany handray anjara amin’izany “World Jiu-jitsu Championship” izany i Madagasikara.
Mi.Raz
French