Mivoatra sy mihatsara ny vita malagasy. Mahasarika ny besinimaro fa indrindra ny teratany vahiny ny asa tanana malagasy, porofo mivaingana nandritra ny hetsika “salon de la créativité Voatra” andiany faha-10, ny herinandro teo. Nampiranty ny fahaiza-manaony avokoa ireo mpandraharaha samihafa nandritra ny hetsika izay nahaliana ny mpitsidika. Samy afapo ny rehetra, na ireo mpandray anjara na ireo mpitsidika na ny mpikarakara ny hetsika. “Tombony taminay ny fandraisana anjara ny “salon Voatra”. Manomboka fantatry ny olona izahay ary betsaka ireo manontany ny vokatra ataonay”, hoy Ratsimba Henintsoa, mpandraharaha raphia, sambany vao nandray anjara tamin’ny salon. Notohizany fa tsara ihany koa ny tsena nandritra ny efatr’andro nanaovana ny hetsika. Manantena ny hitombon’ny mpanjifa ny tenany. Marihina fa manodidina ny 32 tapitrisa ny vokatra malagasy naondrana any ivelany raha toa ka 15 tapitrisa izany teo aloha.
Fihaonana
Fotoana nihaonan’ireo samy mpandraharaha ny salon Voatra. “Tonga nitsidika anay ireo mpandraharaha Israelianina ary nampanantena fa handray ny vokatra ataonay”, hoy kosa i Tiana, mandraharaha amin’ny tantely. Nahavelombolo sy nampirisika ny mpandraharaha hivoatra hatrany ny hetsika noho izy ahitana tombontsoa samihafa raha tsy hitanisa fotsiny ny tohana omen’ny Antenimieran’ny indostria sy ny varotra (CCIA). Tanjona ny hampahafantatra ireo orinasa madinika sy salantsalany nahavita nanao zavatra sy nampiroborobo ny fahaiza-manaony tao anatin’ ny 10 taona. Fa indrindra hanandratra ny vita malagasy. Tsiahivina fa miisa 60 ireo mpandray anjara ny hetsika. Nisy tamin’izy ireo no efa nisitraka fanohanana tamin’ny CCIA.
Henintsoa H.
French