Naneho ny heviny avy hatrany, taorian’ny namoahan’ny Ceni ny voka-pifidianana vonjimaika ny sabotsy teo, ny kandidà Andry Rajoelina. Nambarany fa manam-pahendrena ny vahoaka.
“Ankehitriny, tsapa fa manana fahendrena ny vahoaka malagasy, indrindra tsy manaiky korontana na korontanina intsony”, hoy ny kandidà lah. 3, Andry Rajoelina, taorian’ny famoahan’ny Ceni ny voka-pifidianana vonjimaika teny Alarobia, afakomaly. Miandry amim-pitoniana ny voka-pifidianana ofisialy havoakan’ny HCC ny rehetra. Mila miara-mientana ny rehetra, tsy tokony hisy ny fanilikilihana sy fanavakavahana. Ho filohan’ ny vahoaka malagasy iray manontolo izy, hampandroso an’i Madagasikara sy hampitambatra ny Malagasy. Raha zavatra ratsy no novoizin’ny sasany teto amin’ny firenena, hita ny fitoniana sy ny filaminana. Tsy nisy ny naratra na korontana tao anatin’ny fifidianana. “Izay no isaorako ny vahoaka malagasy iray manontolo, na ireo nifidy na ireo tsy nifidy ahy: naneho ny heviny sy ny safidiny amin’izay hitantana indray ny firenena mandritra ny dimy taona manaraka”, hoy izy.
Fanohizana ny asa natao ho an’ny vahoaka
Hita tamin’ny fampielezan-kevitra fa maniry ny hitohizan’ ny asa natao ny vahoaka. Mbola betsaka ny ezaka tokony hatao handresena tanteraka ny fahantrana eto Madagasikara, ahazoana manakaiky kokoa ny vahoaka, hitondra fampandrosoana andrandrain’ny vahoaka efa taona maro. Nampiavaka ny fifidianana teto Madagasikara: tsy nisy ny naratra. Matetika rehefa misy ny fifandirana politika, hita any amin’ny firenen-kafa: alohan’ ny fahazoana voka-pifidianana, misy ny fifandonana amin’ireo mpanohana kandidà, misy korontana, maratra…
R. Nd.
French