Hampivoatra sy hampiroborobo ny toekarena ny fiverenan’ny zotra an-dalamby mampifandray an’Antananarivo sy Antsirabe rehefa niato nandritra ny efa-taona.
Hiverina amin’ny laoniny indray ny zotra an-dalamby mampitohy an’Antananarivo sy Antsirabe (TA) rehefa niato nandritra ny efa-taona. Nanamafy ny Madarail fa niverina nanomboka ny sabotsy teo ny fivezivezen’ny lamasina amin’ ireo toerana samihafa mampifandray ny Renivohitra amin’ny faritra Vakinankaratra. Niainga teo amin’ny gara Soanierana, ny sabotsy maraina tokony ho tamin’ny 7 ora sy 20 minitra teo, ihany koa ny “draisine” fampiasa amin’ny fanamboarana ireo fotodrafitrasa ka nigadona tao Antsirabe tokony ho tamin’ny 11 ora atoandro, araka ny fanazavan’ny orinasa Madarail.
Na izany aza, mbola misy ny fanamboarana sy fanatsarana ny fotodrafitrasa samihafa hanatanterahana ny tetikasa. Hiverina tsy ho ela, araka izany, ny fitaterana entana sy solika ary ny vokatra hihazo an’Antsirabe raha mbola andrasana kosa ny fitaterana olona. Tsiahivina fa ny 10 novambra 2016 no nisy lamasinana niasa farany nampitohy an’Antananarivo sy Antsirabe. Nikatona tanteraka kosa ny zotra TA ny taona 2019, noho ny fahasimban’ny fotodrafitrasa sy ny asa fanamboarana tsy maintsy natao.
Toekarena
Hampiroborobo ny toekarena ny fiverenan’ny zotra an-dalamby, indrindra ho an’ireo toerana saro-dalana. Hanampy amin’ny fitaterana entana izy io, indrindra ho an’ny famatsiana solika any an-toerana. Tsiahivina fa niverina ny volana jona teo ny zotra an-dalamby, mpitatitr’olona “Diatsara” mampitohy an’i Moramanga sy Toamasina ary Moramanga sy Ambila. Toy izay ihany koa ny zotra an-dalamby mpitatitr’olona mampitohy an’i Fianarantsoa sy Manakara (FCE) rehefa niato nandritra ny volana maro.
Henintsoa Hani
French