Mangingina ratsy ny tontolo politika amin’izao? Miandry ny fanatanterahan’ny filohan’ny Repoblika fianianana eny amin’ny kianja Barea, Mahamasina, amin’ny 16 desambra ho avy izao. Hanao ahoana? Misy ny ambana amin’ny mety hisian’ny fanakorontanana mialoha na amin’io andro io. Manoloana izany, efa nisy fampitandremana nataon’ny filoham-panjakana mpisolo toerana, ny jeneraly Ravalomanana Richard, tamin’ny herinandro. Teo koa ny nambaran’ny prefet de Police, Antananarivo, ny jenerely Ravelonarivo Angelo, ny amin’ ny tsy fahazoana manao hetsika politika mialoha izany. Mbola nohamafisin’ity farany, teny Tsimbazaza, omaly, fa atao ny fahamalinana bebe kokoa noho ny ambana mety misy. “Fantatra ny zava-misy eto amin’ny firenena amin’ izao”, hoy izy. Tsy maintsy ambenana manokana koa amin’ izany ireo toerana saro-pady eto Antananarivo, toy ny tobin-tsolika, tobim-pamokarana herinaratra, ny barazy toy ny eny Tsiazompaniry, ohatra. Sanatria, mety misy manao ankasomparana na sabotazy amin’ireny, araka ny fanazavany. Ho avy amin’ity herinandro ity koa ireo filoham-panjakana na filoham-pirenena hanotrona sy hanome voninahitra ny lanonana. Tsy maintsy omanina ny fandraisana azy ireo, ary hojerena manokana ny fisahanana ny fiambenana amin’izany eo anatrehan’ny toe-draharaham- pirenena amin’izao fotoana izao.
R. Nd.
French