Taxi-be 109 nifatratra tamina andrin-jiron’ny jirama teo Analamahitsy, omaly maraina. Potika tanteraka ny fiara. Niongotra hatramin’ny andrin-jiro. Voalaza ho fahatapahan’ny hisatra no niteraka ny loza. Nandeha mafy loatra ny fiara, raha ny fahavoazana hita taminy.
Zazalahy handeha hianatra vaky loha nofaohan’ny moto, teny amin’ny lalan’ny Tsarasaotra, omaly maraina. Nandeha mafy ilay mpitondra moto ka tsy nahita ilay zaza niampita tampoka. Efa samy nentin’ireo nanatri-maso nihazo ny hopitaly ilay zaza sy ny mpitondra moto naratra.
Maty tsy tra-drano ny olona iray lasibatry ny fanafihana tao Salfa Ilakaka, afakomaly alina. Niditra an-keriny tao an-trano ireo jiolahy nitam-piadiana. Naratra mafy kosa ny naman’io namoy ny ainy io. Anatin’ny fanadihadiana ny mpitandro filaminana ao an-toerana.
Naiditra am-ponja, afakomaly, ilay tovolahy namono ny sakaizany tao Toamasina II. Novonoin’io lehilahy io sy ny namany roa hafa tamin’ny fomba feno habibiana io vehivavy io, ny 4 desambra teo, ka nariany tao anaty ala. Mbola karohina ireo roa lahy namany.
French