Mifamahofaho ny vaovao nahafatesana lehilahy iray teny Mahitsy, tamin’ny alakamisy alina. Ny zandary milaza fa jiolahy. Ny fianakaviany manambara fa tsy olon-dratsy.
Maty voatifitry ny zandary ny lehilahy iray voalaza fa dahalo tetsy Mahitsy, ny alin’ny alakamisy hifoha ny zoma 15 desambra teo. Araka ny loharanom-baovao avy amin’ny zandary, mody nisotrosotro niaraka amin’ny namany tao amin’ny trano fisotroana tamin’ny andro alina io lehilahy io. Norahonan’izy ireo anefa ny mpivarotra rehefa nasaina nivoaka izy ireo noho ny andro efa alina. Namoaka basy poleta ilay lehilahy rehefa tonga ny zandary. Voatery nanao ny asany ny mpitandro filaminana.
Etsy ankilany, nampiantso mpanao gazety ny fianakavian’ny maty. Nanamafy izy ireo fa tsy dahalo velively ilay voatifitry ny mpitandro filaminana. “Mamboly sy miompy no foto-pivelomany”, hoy ny loharanom-baovao tao an-toerana. Hitsena ny namany avy any Ankazobe no anton-diany tao amin’ilay toeram-pisotroana eo Mahitsy. “Navokan’ny zandary tao anaty trano fisotroana ireo vatan-dehilahy mpisotrosotro tokony ho tamin’ny 9 ora alina”, hoy hatrany ny loharanom-baovao. “Efa mamo izy. Tavela farany tao. Nosavaina ny sakaosy teo aminy. Voalaza fa nisy vola sy fitaovam-piadiana tao anatiny. Nisy taratasy ara-dalàna kosa ny basy”, hoy ny mpiara-monina taminy namarana ny resaka.
Tsiahivina fa maty voatifitra inefatra ilay lehilahy izay nohamafisin’ny mpiara-monina taminy fa tsy dahalo. Tantara mitohy!
Tsiferana R.