“Raha misy ny fanatsarana azo atao amin’ny maha filohan’ny SMM ahy, jereo avokoa izay vesatra sy zavatra mampitarazoka ny raharaha ao anatin’ny fehezan-dalàna famaizana ary amin’ny raharaha ady madio dia ny fehezan-dalàna momba ny paikady madio”, hoy ny filohan’ny Sendikan’ny mpitsara eto Madagasikara (SMM), Andriantsihorisoa Mbitanarivo, teny Antsahamanitra, afakomaly, ny amin’ny fandehan’ny fanenjehana ara-pitsarana. Niteraka resabe tato ho ato fa ao ny mihisatra ary misy ny haingana. Mba misy fahatoniana ny ao anatin’ny asam-pitsarana amin’izay fijerena ny vesatra na zavatra mampitarazoka ny raharaha izay.
“Ny hoe haingana loatra sy misy tratra aoriana loatra: manana fehezan-dalàna famaizana isika amin’ny raharaha ady heloka, ary fehezan-dalàna momba ny paika ady madio amin’ny raharaha ady madio”, hoy izy. Misy sokajiny maromaro ny fomba fanenjehana amin’ny raharaha ady heloka, fa tsy hoe haingana loatra na ela loatra ny fandehan’ny raharaha itsy na iroa. Satria misy ny fanadihadiana eo amin’ny mpikaroka fandikan-dalàna amin’ny fanadihadiana mialoha na savaranonando.
Eo koa ny eo anivon’ny fampanoavana izay tsy voatery tazoniny ny antontan-taratasin’ady amin’izany, fa tsy maintsy mandeha famotorana. Ara-dalàna raha misy mandeha izany. Satria raha voatazona amin’ny famotorana tsotra, ohatra, ny antontan-taratasin’ady iray, eo dia efa mety misy fanapahan-kevitra raisin’ny mpampanoa lalàna. Raha mandeha famotorana ny antontan-taratasin’ady, tsy miantsy mbola mila fanadihadiana lalindalina kokoa ary izay ny famotopotorana ataon’ny mpitsara mpanao famotorana.
R. Nd.
French