Niakatra teny amin’ny fitsarana ady heloka bevava, ny 21 desambra 2023, ny raharaha fanafihana mitam-piadiana tao Valpinson Toamasina. Vola 6 tapitrisa Ar no very tamina trangana fanafihan-jiolahy, ny 19 janoary 2023. Nanao fanarahan-dia ny polisin’ny Fip taorian’ny fanafihana. Vokany, voasambotra ry Razafindrakoto Be Nestor sy ny namany, araka ny voarakitra ao anatin’ny antontan-taratasin’ady laharana faha 185-Toa/23-1199-RP/23. Vonoan’ olona efa nomanina, firaisana tsikombakomba, fampiasana fitaovam-piadiana tsy nahazoana alalana ny vesatra hiampangana ireto efa-dahy voampanga. Ankoatra ity laharana antontan-taratasin’ady ity, mbola misy antontan-taratasin’ady roa hafa nitsarana ireto jiolahy ireto teo anoloan’ny fitsarana ambony dia ny laharana faha 184-Toa/23-1140-RP/23 sy ny 186-Toa/23-1393-RP/23. Naharitra adim-pamantaranandro 10 ora ny fifandaharana ka nohafahana noho ny fisalasalana ireo voampanga.
Ranomaso ny an’ireo fianakaviana…
Nitsotra rahateo ny mpitory fa zana-drahalahin’ny maty ihany no nahavanon-doza sy atidohan’ny fanafihana. Nanamafy izany koa ny firaketana teny amin’ny famotorana nataon’ireo vavolombelona. Nanao izay ho afany tamin’ny fiarovana ireo voampanga kosa ny mpisolovava. Nilatsaka ny didy ka afaka izy rehetra. Tsiahivina fa nisy nanafika teo amin’ny sampanan-dalana Valpinson ny raim-pianakaviana iray nandeha moto avy naka vola tany amin’ny Canal plus. Haterina any amin’ny kioska eo anoloan’ny Cité Valpinson io vola 6 tapitrisa Ar io kanjo niharan’ny fanafihana narahina vonoan’olona. Latsa-dranomaso ny fianakavian’ireo niharam-boina taorian’ny didim-pitsarana.
Sajo
French