Nifarana omaly, tany Tokyo Japan, ny fifaninanana « Grand Slam de Tokyo »n taranja Judo. Tsy nahomby ny solontena malagasy nandray anjara, Randrianasolo Lova Mahaisoa, izay nihintsana tamin’ny dingana voalohany, tamin’ny alalan’ny Ippon, nanoloana ny mpifanandrina taminy, i Stodolski Adan, judokas Polonais, sokajy latsaky ny 73 kg. Judokas tokana nifaninana i Lova, ankoara ilay judokas teratany vahiny mitondra ny anaran’i Madagasikara, i Janeiro Chan Ling, izay resy tamin’ny Ippon ihany koa nanoloana an’i Bayabmunkh Narmandakh (MGL). Tsiahivina fa fifaninanana tafiditra amin’ny fifanintsanana hahazoana tapakila hiatrika ny lalao Olympika 2024 hatao any Frantsa, ity Grand Slam ity.
Judokas miisa 346, lehilahy ny 201 ary vehivavy kosa ny 145, ny tonga nifaninana tany Tokyo, avy amin’ny firenena 59 maneran-tany. Nahitana mpikatroka afrikanina 11 nandritra izany. Nisongadina tanteraka ary nahazo ny medaly betsaka indrindra ny firenena japoney na teo amin’ny sokajy lehilahy izany na ny sokajy vehivavy. Medaly volamena miisa 12 be izao no indray noraofin’ity firenena nampiantrano ny Grand Slam ity.
Araka ny efa nampahafantarina, hitohy avy hatrany amin’ny fifaninanana natokana ho an’ny judokas manana olana ara-pahitana ity Grand Slam ity, ny 12 desambra izao. Mikasa ny handefa solontena iray amin’izany i Madagasikara, saingy mbola anatin’ny fitadiavana izay hanampiana ny hoenti-manana amin’izany ny federasiona sy ny Coach mpikarakara azy amin’izao fotoana izao. Tokony hanainga rahampitso
6 desambra i Nampoina ilay judokas jamba sy ilay mpanazatra azy.
Mi.Raz
French