TSELATRA

Mpangarom-paosy miandry mpandeha amin’ny taksibrosy voasambotry ny mpitandro filaminana tao Ankirihiry, Toamasina, omaly hariva. Tsikaritry ny lasibatra tampoka ny fihetsik’io lehilahy io. Nifandrimbona rahateo ny fokonolona ka noraisim-potsiny izy.
Kamiao lehibe iray nandona mpandeha an-tongotra teny By-pass, afakomaly. Nitsoaka avy hatrany anefa io fiara io taorian’ny loza. Voa mafy ary tsy nahatsiaro tena ilay voadona. Niezaka nanavotra azy ireo nanatri-maso ka nitondra azy teny anivon’ny hopitaly.
Zaza tsy ampy herintaona hita faty nalevina an­tsokosoko teo alohan’ny EPP Antoby, kaominina Betsinjaka, omaly. Nipoitra tamin’ny tany ny lohan’io zaza io, raha toa ka efa nilevina anaty tany avokoa ny vatany. Andalam-pikarohana ny fianakaviany ny tomponandraikitra ao an-toerana.
Nidoboka am-ponja vonjimaika ilay pasitera avy amina fiangonana zandriny nahatrarana moto halatra tao Isada, Fianarantsoa, ny 22 janoary teo. Voasambotry ny zandary teny Tsaramandroso izy. Nahitana moto halatra maromaro niampy kojakoja mifandraika amin’izany tao aminy.