Mandalo dia maka rafahafatesana! Zazakely vao teraka tapa-bolana no maty voadonan’ny moto, omaly. Voafaoka niaraka tamin’ny vehivavy nitaiza azy izy.
Latsa-dranomaso avokoa ireo nahita ireto mpianaka nodomin’ny moto iray tao Ambohidrano, Antsirabe I, omaly tolakandro. Maty tsy tra-drano noho ny dona mafy nahazo azy teny an-trotroan’ny renim-pianakaviana nitondra ilay zazalahikely vao tapa-bolana monja. Raha ny tatitra nampitain’ny zandary, avy niotra izy mianaka. Tra-doza teny an-dalana nody.
Voalaza fa nandeha mafy ny moto nentina tovolahy iray. Nifatratra tany amin’izy mianaka tampoka.
Nilaza hatrany ny zandary nanontaniana an-telefaonina halina, fa tsy afaka nitondra ny zaza nandeha niotra ny reniny satria vao tera-bao. Ny zaobavin-dramatoa no nitondra ilay zanany. Naratra mafy ilay vehivavy nitrotro ny zaza niharam-boina. Nentina haingana namonjy hopitaly izy. Mbola manaraka fitsaboana hatramin’ny fotoana nanoratanay. Nipitika teny an-trotroany ilay zaza, araka ny fanazavan’ireo olona nahita ny fitrangan’ny loza.
Manoloana ny loza, tezitra ny olona nanatri-maso ka nanampatra ny hatezerany tamin’ilay tovolahy. Tonga vetivety ny mpitandro filaminana, nisoroka ny fitsaram-bahoaka.
Nalefa eny Tsiafahy
Etsy ankilan’izay, naiditra vonjimaika am-ponja eny Tsiafahy, omaly, ilay mpamily taxi-be, zotra 154 nahafaty olona teny Mahamasina, ny sabotsy alina lasa teo. Natolotra ny fampanoavana, omaly, izy rehefa avy notanana teny anivon’ny polisy, nanaovana famotorana.
Nivoitra tamin’ny fakana am-bavany ilay mpamily fa nisy disadisa teo aminy sy ireo mpitondra moto miisa efatra. Mialoha ny tranga teny Mahamasina, nisy voakasik’ilay mpamily ny iray tamin’ireto farany.
Nisy ny fifanenjehana taorian’izay. Nibahana teo alohan’ilay taxi-be mba hijanonany ny moto iray. Tsy nijanona teo anefa ilay mpamily. Mainka nodominy ka voahitsaka ilay mpitondra moto. Vokany, naratra mafy ka maty tsy tra-drano ilay raim-pianakaviana. Nitondra fanazavana momba ity raharaha ity ny rahalahin-drain’ilay tovolahy namoy ny ainy, Randriatsaholy Jean Claude. « Efa maty ny havanay ka mitaky ny hampiharana ny lalàna amin’ilay mpamily izahay », hoy izy niandry an-dranomaso ny fanapahan-kevitry ny mpampanoa lalàna.
J.C
French