Raim-pianakaviana roa lasan’ny rano tao Antsaonjobe, fokontany Andranofotsy, kaominina Fihaonana, distrikan’Ankazobe, omaly tolakandro. Niezaka niampita ny renirano Kelilalina izy mianaka ireo. Nentin’ny rano izy ireo ka nifampitadiavana hatramin’ny omaly hariva saingy mbola tsy hita.
Potika nifandona tamin’ny fiara ny moto iray tetsy Marais Masay, omaly maraina. Tafalatsaka afovoan’ny fiara roa ilay moto ka naratra ny mpitondra azy. Fandehanana mafy sy tsy fitandreman’ilay mpitandro moto sy ny mpamily no heverina niteraka ny loza.
Roa lahy nanendaka mpizahatany tao Nosy-Be Hell ville voasambotry ny polisy, omaly. Nentin’izy roa lahy nitsoaka ny vola. Nanaovan’ny polisy vela-pandrika ireo mpanendaka ireo ka tratra. Efa malaza ratsy amin’ny fanendahana ireo vahiny mpizahatany ao an-toerana ry zalahy ireto.
Naiditra am-ponja vonjimaika ao Taolagnaro ny rangahibe iray 66 taona voarohirohy ho tompon’antoka tamina fanolanana ankizivavy 11 taona tao Amparihy Taolagnaro. Sakaizan’ny renin’io ankizy niharam-boina io ihany ity nahavanon-doza ity.
French