Nitsidika ireo kaominina 15 mandrafitra ny distrikan’i Fandriana, faritra Amoron’i Mania, ny loholona Rasolondratsimba Raymond na Raymond Nala, ny farany herinandro teo. Novaliny ny hetaheta any ifotony: simenitra 1 500 lasaka, fanitso 1 700, loko 1,5 taonina, dabilio 530, jiro 25 000, vola 13 tapitrisa Ar, masininina fihavam-bary folo… Ireo no santionan’izay nekena fa hatolotra.
Nilaza ho vonona hiatrika ny fifidianana solombavambahoaka sy kaominaly ny mpikatroky ny antoko TGV eny amin’ny distrikan’Antananarivo Atsimondrano, izay nanomboka ny fidinana ifotony teny Bongatsara, afakomaly. Vonona hiara-miasa amin’ ny filoha koa ry zareo amin’ny fanatanterahana ny vinam-pampandrosoana.
Nidina ifotony teny amin’ny kaominina Ampitatafika ny fitaleavana misahana ny Fanapariahana sy fandinihana ary fanavaozana lalàna (DERL) eo anivon’ny minisiteran’ny Fitsarana, ny faran’ny herinandro teo. Ireo lalàna vaovao sy ireo nasiana fanovana no nampahafantarina tamin’izany.
Ho fanatsarana ny fiaraha-miasa, nihaona tamin-dRafaravavitafika Rasata, minisitry ny Raharaham-bahiny, ny tomponandraikitra avy amin’ny fitondram-panjakana maraokanina sy algerianina ary ny avy ao Seychelles, nandritra ny fivoriambe faha-37 -n’ny Vondrona Afrikanina.
French