Efa fampisehoan-kery hiatrehana ny fifidianana depiote? Nifampiarahaba noho ny taona vaovao tamin’ny vahoakan’ Ambatofinandrahana ny filohan’ny Antenimierampirenena, Razanamahasoa Christine mivady, ny herinandro teo. Vory marobe ireo vahoaka notarihin’ireo ben’ny Tanàna miisa 9, miaraka amin’ny filohany, i Hajarilala Vololomboahangy, ben’ny Tanàn’ Ambondromisotra. Eo koa ireo sefo fokontany miisa 21 ary ireo fikambanana samihafa eo anivon’ny distrika. “Matoky sy manantena ary manohana anao hatrany izahay… Miandrandra anao koa”, hoy ny solontenan’izy ireo. Nankasitraka izany fanomezan-toky izany Razanamahasoa Christine.
Nialoha izany, notanterahina ny faran’ny herinandro teo koa ny fambolen-kazon’ny distrika Ambatofinandrahana tao Bodana. Miisa 12 000 fototra izany ary ahitana karazany maro.
Efa fanao tao anatin’ny 10 taona
Nitarika izany tahaka ny efa fanao tao anatin’ny 10 taona ny filohan’ny Antenimiera, Razanamahasoa Christine. “Tsy maintsy harahi-maso sy karakaraina ny hazo nambolentsika”, hoy izy. Nitondra ny anjara birikiny tamin’izany ireo solontenam-panjakana rehetra any an-toerana.
Maherin’ny 5 000 ireo vahoaka nanoina ny antso raha mpianatra kosa ny 800. Nandray anjara tamin’izany koa ny fikambanana Mandresy sy Fitiavana ka nankasitrahana manokana izy ireo.
Synèse R.
French