Natolotra ny tale jeneraly (DG) ny fadintseranana malagasy, ny Dr Lainkana Zafivanona, ny 14 sy ny 15 marsa teo, tany Addis Abeba Etiopia, ny loka « African Leadership Commendation Award ».
Fankasitrahana natao nandritra ny lanonana ofisialy nokarakarain’ny gazety boky African Leadership Magazine, ho an’ny mpanao politika, ny mpitantana rafi-panjakana na orinasa tsy miankina sy ny fiarahamonim-pirenena, ny mpitarika fikambanana, hitarafana ny fandrosoana ara-toekarena sy sosialy aty Afrika.
Fankasitrahana ny fahaiza-mitarika sy ny vina nentin’ny Dr Lainkana Zafivanona amin’ ny fanavaozana ny fitantanana ny fadintseranana malagasy ity loka ity. Manome lanja ny ladoany malagasy eo amin’ny sehatra iraisam-pirenena ihany koa.
Maro ny fivoriana iraisam-pirenena noraisin’i Madagasikara. Toy ny fivoriana « Regional Steering Group » (RSG), andiany faha-36 ho an’ny tapanyAtsinanana sy Atsimon’i Afrika (ESA) ho an’ny Fikambanana iraisam-pirenena ny fadin-tseranana (OMD) ny taona 2022. Eo koa ny fivoriana faha-37 ny RSG sy ny faha-29 ny « Gouverning Council », ny taona 2023. Mankalaza ny faha-200 taona niorenany ny ladoany malagasy, izay natrehin’ny sekretera jeneralin’ny OMD, ny Dr. Kunio Mikuriya.
Tafiditra ao anatin’ny fikambanana iraisam-pirenena ny ladoany (OMD) i Madagasikara ny taona 2023. Ao anatin’nyVaomiera politika ankapobeny (Policy Commission) miaraka amin’ireo mpikambana 24, ahitana firenena 186. Mpikambana miaraka amin’ireo firenena telo ao anatin’ny komity mpitantana nyfaritra Atsinanana sy Atsimon’i Afrika (ESA) koa ny ladoany malagasy.
Teknolojia niomerika
Napetraka nanomboka ny taona 2019 ny fandaharanasa fanavaozana tanteraka manaraka ny toetrandro ny fadintseranana eto amintsika. Miisa 31 ny tetikasa ao, toy ny fampidirana ny teknolojia niomerika, ny fiarovana ny vola miditra, ny fanamorana ny fifanakalozana traikefa ary ny fanatsarana ny maha olona. Efa madiva ho eo am-pamaranana daholo ny ankamaroan’ ireo tetikasa ireo.
Njaka Andriantefiarinesy
French