TSELATRA

Naiditra am-ponja, omaly, ilay raim-pianakaviana nanolana ny zanany vavy 13 taona tao Ampotamandrevo, kaominiana Maroala, omaly. Nampihatra ny filan-dratsiny tamin’io zanany naterany io ilay lehilahy 48 taona ny fiantombohan’ny volana marsa teo ka voasambotra.
Vehivavy nisoloky Cash point voasambotry ny mpitandro filaminana tao Voirie Antsirabe, afakomaly. Nampandre ny mpitandro filaminana ny voasoloky. Tratran’ny polisy kendry tohina niala fiara fitateram-bahoaka ity ramatoa ity ka noraisim-potsiny.
Efatra mirahalahy mpanera sady mpivarotra omby halatra voasambotry ny zandary tao Tsaramandroso Gare Antsirabe, ny 19 marsa teo. Voasakan’ny zandary miasa ao Andranomanelatra ireo olona nandroaka ireo omby nampiahiahy. Noraisim-potsiny koa ireo roa tompon’antoka.
Raim-pianakaviana iray namoy ny ainy vokatry ny lozam-pifamoivoizana tao Imerintsiatosika, afakomaly. Voadonan’ny moto izy ka naratra mafy. Nentina namonjy toeram-pitsaboana saingy tsy tana ny ainy.