Filoha Rajoelina: “Tsy atao tsinontsinona ny tolona natao”

Ny fitiavan-tanindrazana sy ny tolona nataon’ireo razambe no fototry ny fampandrosoana. Noho izany, raisina ny faneva hameloma-maso ny hambompom-pirenena

“Tsy ekentsika horabirabiana, hohitsakitsahina, atao tsinontsinona ny tolona rehetra natao teto amin’ity firenena ity. Satria nisy aina nafoy teto, nisy fikasana handroso ho amin’ny soa kokoa eto. Za­vatra sarobidy loatra ny fitiavan-tanindrazana”. Io ny hafatry ny filohan’ny Repoblika, Rajoelina Andry, teny amin’ny Fasan’ny maherifo, Avaratr’ Ambohi­tsai­na, omaly, nanolorana faneva ho an’ny taninketsan’ny fitiavan-tanindrazana sambany natao ho fanamarihana ny 29 marsa 47, taorian’ny fametrahana fehezam-boninkazo. Zava-dehibe ny fitiavan-tanindrazana, fanilo mila ampitaina amin’ny taranaka. Tsy azo kosehina ny tolom-panafahana, tsy azo hadinoina fa maro ireo tia tanindrazana lavo noho ny fitiavan-tanindrazana sy ny fitakiana ny Fahaleo­vantena. Izay indrindra no nanaovana ny teny filamatry ny fankalazana ny 29 marsa 2024: “Ny fitiavan-tanindrazana no fototry ny fampandrosoana”.
Ny fitiavan-tanindrazana sy ny tolona nataon’ireo razambe no fototry ny fampandrosoana tiana hapetraka eto Madaga­sikara. Noho izany, zava-dehibe ny aina nafoy sy ny ra latsaka noho izay fitiavan-tanindrazana nasehon’ireo razambe izay. Dia hatolotra an’ireo tanora ny fanevan’ ny fitiavan-tanindrazana ho mariky ny fanamafisana sy fanomezana hasina ny ady sy ny tolona natao teto amin’ny firenena. Noho izany, raisina ny faneva hamelo-maso ny hambompom-pirenena ary mba tsy ho afaka ao am-po ny fitiavan-tanindrazana.
Nitondra izay hafatry ny filoha Rajoelina izay koa ny minisitry ny Foloalindahy, ny jeneraly Sahivelo Monja Lala Delphin, tamin’ny hetsika tany Moramanga.

R. Nd.