TSELATRA

Niaiky ny heloka vitany ka notanana vonjimaika any am-ponja ny lehilahy iray nikasa hanolana ny zana-badiny vao 11 taona, tao Maroantsetra, afakomaly. Nanararaotra ny tsy fisian’olona tao an-trano izy. Nakariny ny feon’ny zavamaneno, saika hampihatra ny filan-dratsiny tamin’io zazavavy io izy no niditra tampoka ilay renim-pianakaviana.
Voasambotry ny polisy miasa ao amin’ny poste de police Soavina, ny talata maraina teo, ireo jiolahy malaza ratsy amin’ny vaky trano sy sinto-mahery. Teo Bevalala no nanao ny asa ratsiny ireto jiolahy ireto tamin’io fotoana io. Mbola tsy ampy taona ny iray amin’ireo jiolahy. Maro ireo olona efa nitondra faisana tamin-dry zalahy ireto, raha ny fanazavan’ny polisy.
Nodoran’ny fokonolona velona, naratra mafy, ny lehilahy iray nangalatra vilany tao Ambalakondro, kaominina Ambalavero, distrika Manakara, omaly. Kilan’ny afo ny tapany ambany. Nentin’ireo tsara sitrapo namonjy toeram-pitsaboana io lehilahy io.
Zazamenavava narian’ny rainy tao Ambilabe, Maroantsetra, omaly. Manana ratsana 12 io zaza io ary tahaka izay koa ny tongony. Nofonosana lamba izy ary napetraka tao anaty boritra. Avotry ny fokonolona sendra nandalo ary tsy ahiana ny fahasalamany.