Ambony ny tsy fisian’asa: mirongatra ny fisolokiana!

Any amin’ny sehatra fitadiavam-bola sy ny tontolon’ny asa indray no manao ny ataony ny mpisoloky. Tafakatra hatrany amin’ny 15 % ny tahan’ny tsy fananana asa eto Madagasikara.

Mahazo vahana ny fisolokiana amin’ny fanomezana asa, ankehitriny. Tafakatra eo anelanelan’ny 3 hatrany amin’ny 15 % ny tahan’ny tsy fananana asa eto Madagasikara, arakaraka ny faritra. Araka ny tatitry ny ivontoerana misahana ny antontanisa na ny Instat ny volana marsa lasa teo izany. Nanom­boka ny taona 2024, maherin’ny fito mianadahy ireo mpisoloky naiditra am-ponja. Ani­san’izany ilay lehilahy nisandoka sady nanao fanaminan’ny Tafika sy ny roa vavy na­many saron’ny zandary tetsy Ambohimalaza, ny 14 marsa teo. Nisandoka ho mahatafiditra mpiasa eo anivon’ny minisitera koa izy ireo. Ankoatra io, roa lahy hafa nalefa ao amin’ny fonjan’Ambalata­voahan­gy, ny 1 marsa teo. Nisoloky vola an-tapitrisany tao Toamasina izy ireo. Ma­nefa sazy eny Antanimora koa, ireo mpisoloky amin’ny alalan’ny fandesafana SMS tra-tehaky ny polisy teny Anka­sina, ny 16 janoary teo. Marihina, misandrahaka amin’ ny sehatra maro samihafa ny fisolokiana ataon’ireo olon-dratsy. Fandefasana olona hiasa any ivelany, ny fikirakirana vato sarobidy hosoka hatramin’ny fisandohana andraikitra.

Volabe
Roa lahy mpisoloky, milaza ho mpisehatra amin’ny fanoratana « campagne de saisie » izay asa mifandray amin’ny orinasa any ivelany no voasambotra tao Mahajan­ga, ny zoma lasa teo. Teny Andohatapenaka no nanombohan’izy roa lahy nisolo­ky. Olona iray lasibatra ka nahazoany vola nitetina 3 tapitrisa Ar. Nifanena tampoka tamin’ny mpisoloky azy ireo tany Mahajanga ilay lasibatra. Nasain’ireo mpisoloky nanefa vola ana hetsiny hatrany anefa ity mpisoloky. Nitoroka teny amin’ny manam-pahefana ity farany. Nanao ny fikarohana ny mpitandro filaminana. Vokany, sarona ireo roa lahy. Nahitana solosaina maromaro tao amin’izy ireo. Tambazan’ ireo roa lahy karama manodidina ny 5 960 000 Ar ireo olona. Tafalatsaka amin’ny fisolokiana ataon’izy ireo, araka izany, ireo olona izay maika hiasa sy hahazo vola vetivety.

Tsiferana R.