Amin’izao fotoana izao, efa hita taratra ny misy ny jiolahy rehetra ho mpanatanteraka ny fakana an-keriny ao Ankazobe. Azo lazaina fa efa voageja anaty faritra iray tsy ahafahana mivoaka izy ireo. Hatramin’ny olona miafina aty an-drenivohitra aza, tokony efa ho tratra. Olana anefa, tena sahirana ny ekipa mpanao hetsika fampandrian-tany any ifotony. Tsy misy na fitaovana toy ny radio ifaneraserana aza, ny toerana anefa voafetra ny mahazo telefaonina. Na ny masolavitra aza tsy hananana, indrindra ny fitaovana ahafahana mivezivezy amin’ny alina. Dia an-tongotra mamakivaky tendrombohitra kanefa tsy misy vatsy na sakafo akory.
Anisan’ny fitaovana hany mahavaha haingana ny olana ao amin’ny faritra hisian’ny fakana an-keriny ny fanetsehana ny angidimby hanampy ny mpandeha an-tongotra. Na efa misy aza ny fifandonana mahery vaika, tsy mihetsika izany ny helikoptera. Mivezivezy kosa anefa izy ireny rehefa hitaterana tomponandraiki-panjakana. Tsy hita amin’ny fotoana tena ilana azy ka mba hisy vokany mivantana amin’ny vahoaka.
Manoloana izany, misy ny antso avo ataon’ny mponina ao amin’ny distrikan’Anjozorobe, Ankazobe, Tsaratanàna, Andilamena, Maevatanana, hatraty Ambohidratrimo, ny tokony hametrahana ny helikoptera any amin’ny toerana ilana azy. Miantso ny filohan’ny Repoblika ny mponina ao Ankazobe mba hampitaovana ny Kaompania ao an-toerana. Faritra mena sy midadasika ( 2/3 ny velaran’ny faritra Analamanga) kanefa tsy manana na moto iray aza, tsy manana na fiara 4×4 iray.
Antoka ahafahana mifehy ny fandriampahalemana ny fanomezan-kasina ny mpitandro filaminana.
Jean Claude
French