Namoaka fanambarana amin’izao hiatrehina ny fifidianana solombavambahoaka izao ny masoivoho amerikanina. Tafiditra ao anatin’izany ny fanombohan’ny vanim-potoanan’ny fampielezan-kevitra. “Raisinay ho porofon’ny fahavononana hampihatra ny demokrasia izao dingana lehibe izao. Zava-dehibe ny fanatanterahana ny fifidianana malalaka sy ara-drariny ary am-pilaminana”, hoy ny fanambarana.
Nanentana ny vahoaka malagasy koa izy ireo mba handray anjara mavitrika sy am-pilaminana amin’ny zotram-pifidianana. “Aoka tsy hisy herisetra sy fandrahonana ary hosoka izany”, hoy ihany ny Amerikanina. Nanterin’ny fanambarana fa manan-danja lehibe eo amin’ny fifandraisan’izy ireo maneran-tany ny fampiroboroboana ny soatoavina demokratika, ary manohana ny ezaka rehetra mba hisian’ny fifidianana mangarahara eto Madagasikara izy ireo, araka ny fanambarana hatrany.
Nanao antso avo amin’ny mpitondra sy ireo mpilatsaka hofidina ary ny olom-pirenena rehetra koa ny Amerikanina mba hanao fampielezan-kevitra am-pilaminana sy mampivoatra. “Maneho ny tena fampiharana ny demokrasia sy ny fametrahana fanjakana tan-dalàna”, hoy ihany izy ireo.
Tsiahivina fa vao avy nihaona tamin’ireo eo anivon’ny mpitarika ny vovonana Firaisankina, teny Andranomena, ny masoivohon’i Etazonia. Naharitra ora roa ny fihaonana ary henjankenjana ny fihaonana teo amin’ny andaniny sy ny ankilany tamin’izany.
Synèse R.
French