Tratran’ny zandary ny mpamaky trano iray tao amin’ny fokontany Mandrosoa-Ivato, afakomaly. Niditra tao andavarangana io olon-dratsy io ka tazan’ny mpifanolobodirindrina. Nampandre ny mpitandro filaminana ny nanatri-maso ka noraisim-potsiny teo am-panaovana ny asa ratsiny io mpamaky trano io.
Moto scooter 4T saron’ny zandary natosiky ny olon-dratsy tao Andoharanofotsy, omaly maraina tamin’ny 1 ora. Nitsoaka avy hatrany ireo mpangalatra rehefa nahita ny zandary nifanena tamin’izy ireo. Navelany teo afovoan-dalana ny moto. Nentin’ny mpitandro filaminana nihazo ny biraony io kodiaran-droa io.
Voasambotra tao anaty taxi-be ireo roa lahy mpangarom-paosy tao Atsinanantsena, Antsirabe, omaly. Olon-tsotra nandeha tao amin’io fiara fitanteram-bahoaka io no lasibatra. Tratra taorian’ny fanadihadian’ny polisy ny mpandray ireo entana halatra alain’ireo mpangarom-paosy roa lahy ireo.
Naiditra vonjimaika eny Antanimora ny lehilahy nanodinkodina zaza tsy ampy taona tratran’ny zandary tao amin’ny fokontany Andranovao, kaominina Ambohimangakely, afakomaly. Nentiny nandositra ilay ankizivavy 13 taona. Nifampitadiavan’ny fianakaviany ity farany ka fantatra fa nasitrik’io lehilahy io.
French