TSELATRA

Naiditra am-ponja, omaly, ny efatra tamin’ireo jiolahy dimy tratran’ny zandary avy ao amin’ny poste fixe Anosizato. Tonga nametraka fitoriana tao amin’ny zandary ny lehilahy iray niharan’ny fanendahana nataon’ny jiolahy. Lasan’ireo jiolahy ny finday, bisikileta ary vola 5 alina Ar. Nanao fikarohana ny zandary ka tratra ireo andian-jatovo mpanendaka.
Ramatoa iray tratra nangalatra vilany 25 isa tao Talata Volonondry. Maro ny vaky trano efa vitan’ity ramatoa ity. Tonga nametraka fitoriana teny amin’ny zandary ireo niharan’ny vaky trano. Nanao fikarohana ny zandary ka niafara tamin’ny fisamborana azy. Vokany, naiditra am-ponja avy hatrany ity farany.
Lavon’ny balan’ny polisy ao Taolagnaro, afakomaly, ireo jiolahy roa raindahiny amin’ny fanafihana. Nihaodihaody manodidina ny tsena ao Tanambao sy Ankorondava ireo jiolahy efatra niaraka tamin’ny basy. Nidina haingana tao an-tsena ny polisy ka raikitra teo ny fifandonana. Roa lahy maty voatifitra raha tafaporitsaka ireo namany. Basy roa sy bala efatra azon’ny polisy.