Mitana anjara toerana lehibe eo amin’ny fanabeazana sy mikolo ny saina ny fiangaliana ny zavakanto. Tsy vitan’ny fananana talenta fotsiny anefa izany, ilaina ny mamantatra ny fenitra eo amin’ny fanaovana sary mba hahatongavana eo amin’ny sehatry ny matihanina.
Tanterahina eny amin’ny Lapan’ny Tanàna Analakely, nanomboka omaly ary hitohy anio, ny fampirantiana ny sanganasan’ireo mpianatra nanaraka ny fiofanana momba ny sary hosodoko, ny sary sokitra ary ny sary lasitra, tao anatin’ny hetsika « Fialantsaratra Kanto ». Miisa 70, avy amin’ireo tranomboky monisipaly, manerana an’Antanananarivo izy ireo, nandritra ny 2 volana no niatrehan’izy ireo ny fiofanana. Ankoatra ny fampiroboroboana ny zavakanto, tanjona ny hanomezana sehatra eny amin’ny fiarahamonina, izay mitondra fahalalana sy fanabeazana.
Fikambanana mpanao sary hosodoko sy sary lasitra ary sary sokitra maro samihafa no nivondrona. Izy ireo izay nanam-piniavana ny hanohy ny tetikasa “Kanto manabe”. Tetikasa mikendry ny hitrandraka ny talenta miafina eny ifotony sy hampivelatra ny zavakanto, indrindra ny sary. Anisan’ny lehibe izy ity, satria niainga hatrany amin’ny fampiofanana ireo hampiofana eny amin’ireo Tranomboky monisipaly, isaky ny boriborintany eto Antananarivo ny hetsika. Ireo mpampiofana nampiofanina ireo indray no nizara isaky ny boriborintany, rehefa vita ny fampiofanana azy ireo.
Anisan’ny dingana famaranana ny hetsika ny fanaovana fampirantiana. Hanehoan’ireo mpiofana ny nampianarina azy ireo. Ankoatra izay, nisy ihany koa ny fanolorana mari-pankasitrahana ireo nahavita fiofanana. Taratra nandritra ity hetsika ity fa maro ny ankizy sy tanora malagasy manana talenta ary antenaina ho lasa lavitra. Ilaina anefa ny tohana sy tosika sahala amin’izao mba hahafahan’izy ireo mampivoatra ny fahaiza-manaony sy ny talentany ary koa mampivelatra ny zavakantony.
Lin
French