Nosokafana tamin’ity herinandro ity ny fanamarihana ny faha-40 taonan’ny Ecole Nationale de l’Informatique (ENI) ao amin’ny oniversiten’i Fianarantsoa. Anisan’ny sekoly ambony mamokatra mpianatra sangany amin’ny sehatry ny informatika ny ENI.
Manaporofo izany indrindra ny firohotry ny tanora na avy aty an-drenivohitra aza tonga mandrato fianarana any Fianarantsoa raha handalina ny tontolon’ny informatika noho ny lentan’ny diplaomam-panjakana avoakan’ny sekoly. Tanjon’ny ENI ny haha renivohitry ny haitao ara-kajy mirindra an’i Fanarantsoa.
Hetsika roa no nentina nanamarihana ny faha-40 taona dia ny “Global tech Summit”, nokarakarain’ny Akata goavana, ny ENI ary ny Emit. Fihaonan’ny mpisehatra sy mpikaroka ny informatika sy ny teknolojia haharitra efatra andro any an-toerana.
Teo koa ny fanomezana mari-pankasitrahana Doctorat Honoris Causa an-dRamorasata Elie Etienne, izay vy nahitana sy angady nananana ny sampam-pampianarana ENI.
Fampianarana mahasarika ny tanora ary mitondra amin’ny sehatrasa maro ny informatika. Efa amin’ny alalan’ny informatika avokoa no hifehezana ny ankamaroan’ny asa ary tsy avelan’ny fandrosoana amin’izany i Madagasikara, raha ny fanazavan’ny mpianatra ao amin’ny ENI. Na ny asa tsotra indrindra aza ankehitriny dia mitaky fifehezana ny informatika ka tsy azo ihodivirana intsony izany.
Tatiana A
French