Notafihin’ny dahalo fito lahy ny tokantrano iray tao Alakamisy Itenina, afakomaly alina. Lasa ny vola, naratra ny tompon-trano.
Raikitra ny vely kibay sy ny fandratrana tamin’ny famaky nataon’ny jiolahy fito lahy tao amina tokantrano iray anatin’ny fokontany Marokona III, kaominina Andranomiditra, distrikan’i Vohibato, ny alin’ny 8 hifoha ny 9 oktobra teo. Nitondra basy vita tanàna, nanafika tsenambarotra iray. Tsy nisy nisaron-tava, niditra an-keriny tao amin’ ny renim-pianakaviana iray ireo olon-dratsy ary nitaky ny vola. Nanakorontana avy hatrany izy ireo. Noterena hamoaka ny vola ny tompon-tsena. Lasa tamin’izany ny vola 9 000 000 Ar. Vidim-bary avokoa io lasan’ireo tsy valahara io. Norobainy koa ny entam-barotra samihafa niaraka tamin’ny radio niampy telefaonina.
Roa lahy naratra mafy
Nahare ny tranga, niezaka hanavotra ny lasibatra ny roa lahy anisan’ireo fokonolona tao an-tanàna. Tsy nilefitra anefa ireo jiolahy fa nampiasa ny fitaovam-piadiana teny am-pelatanany. Vokany, naratra mafy voakapa famaky ny lehilahy iray. Ankoatra io, voan’ny bala teo amin’ny tratrany ny iray hafa nanampy azy. Nirifatra nandositra niaraka tamin’ ny vola sy ny entana halatra ireo fito lahy nanafika taorian’io. Nentina nihazo ny toeram-pitsaboana ireo roa lahy naratra mafy. Mandray an-tanana ny fanadihadiana ny zandarimaria ao an-toerana. Atao hazalambo ireo nahavanon-doza.
Tsiferana R.
French