Mbola nanamafy ny fampitandremany. Mitohy ny atrikasan’ny Fitsarana avo momba ny lalàmpanorenana (HCC) nampahafantarana ireo fepetra sy ny lalàna tokony harahina.
Anisan’ny nentin’izy ireo tamin’izany ny fampahafantarana amin’ireo mpirotsa-kofidina sy ny mpanohana azy ary ny fiarahamonina sivily ny amin’ny fifanolanana momba ny raharaham-pifidianana sy ny dingana tsy maintsy arahina amin’ny fanaovana fitoriana. Nifampizara amin’ny fitetezana ireo renivohi-paritany ny mpikamban’ny HCC, taorian’Antananarivo. “Tsy voalazan’ny lalàna ny amin’ny vanim-potoana mialoha ny fampielezan-kevitra, fa ny momba ny fampielezan-kevitra no voalazan’ny lalàna”, hoy ny fanazavan’ny filohan’ny HCC, Rakotoarisoa Florent, tany Toliara, afakomaly. Mazava ny voalazan’ny lalàna ny amin’izay azo atao sy tsy azo atao mandritra ny fampielezan-kevitra. Raha misy fihoaram-pefy na fandikan-dalàna, mety mitarika amin’ny fanalana an-daharana ny mpirotsa-kofidina izany. Na mahatonga fanafoanana voka-pifidinana manontolo na amin’ ny ampahany koa izany.
Fanalana an-daharana ny kandidà
Nomarihiny fa amin’izao mialoha ny fampielezan-kevitra izao, mahazo mampahafantatra ny momba azy ny mpirotsa-kofidina sy ny mpanohana azy. Efa navoakan’ny Ceni ny lisitra ofisialin’ny kandidà manerana an’i Madagasikara. Na izany aza, fady sy tsy azo atao ary mety hitarika amin’ny fanalana an-daharana ny mpirotsa-kofidina amin’ny fifidianana ny filazana hoe: “Fidio aho”, “Fidio Ranona”. Tsy tokony hanao an’izany ny kandidà, ny antoko mpanohana azy, ny mpanohana azy. Nohamafisiny izay mba tsy hisian’ny fifanomezan-tsiny, Ho avy ny sazy raha misy ny fitoriana. Na raha tsy misy ny fitoriana fa misy mampahafantatra amin’ny HCC ary ananana porofo.
R. Nd.