Tontosa soa aman-tsara ny fifidianana izay ho filoha hitantana ny federasionina malagasin’ny atletisma (FMA). Tafaverina hitondra izany indray mandritra ny efa-taona manaraka, Andriamahazo Norolalao. Izy indray izany no handimby an-dRaherison Dominique.
Notanterahina ny sabotsy lasa teo, teny amin’ ny Ininfra Alarobia, ny fivoriamben’ny fifidianana ny taranja Atletisma malagasy. Andriamahazo Norolalao, indray no hitantana ny Federasionina malagasin’ny Atletisma, mandritra ny efa-taona manaraka. Nahazo ny vato 8 tamin’ireo ligy 14 tonga nifidy izy. 3 avy kosa ny an’ireo mpifanandrina taminy dia i Jean de La Croix Mahatana sy Raharison Dominique, filohan’ny FMA teo aloha. Nambaran’ity filoha vaovao ity, fa tanjona ny hanarenana ny atletisma malagasy, izay mbola miatrika olana maro eo ny fiatrehana ny fifanintsanana iraisam-pirenena, eo ny tsy fahampian’ny fitoavana ho an’ireo atleta. Manana fikasana ny hanamafy ny fitantanana ao anaty mangarahara Andriamahazo Norolalao. Nanamafy izy fa tombony ho an’i Madagasikara ny maha mpikambana azy ao amin’ny Kaonfederasionina Afrikanina Confédération Africaine d’Athlétisme sy ny faritra Atsimo, satria manamora ny fahazoana ny vaovao sy ny fanofanana ary fanohanana ho an’ireo mpanazatra sy atleta malagasy izany. Ankoatra izay, nilaza ny mpitantana vaovao fa haverina ilay ivontoeram-panofanana ho an’ireo atleta izay nahitan’ny Malagasy fahombiazana hatramin’izay. “Mialoha ny faran’ ny taona, hoezahina haverina io ivontoerana io, mba hahafahan’ny atleta manao fanazaran-tena, ary mba hahazoana vokatra tsara amin’ny lalaon’ny Nosy 2027”, hoy Andriamahazo Norolalao. Ampahafantarina ihany fa efa nitantana ny FMA, tao anatin’ny fe-potoam-piasana roa ny tenany. Bongolava, Amoron’i Mania, Diana, Analamanga, Ihorombe, Boeny, Alaotra Mangoro, Itasy, Matsiatra Ambony, Vakinankaratra, Atsimo Andrefana, Ihosy, Fitovinany ary Atsinanana, ireo ligy nandatsa-bato.
Fitia Randria
French