Mitohy ny fanatanterahana ny Tetikasa Volobe. Nihaona sy nampahafantatra ny fivoaran’ny tetikasa sy ireo dingana manaraka mbola hatao tamin’ny Filohan’ny Antenimierampirenena ireo tompon’andraikitra ao amin’ny Compagnie Générale d’Hydroélectricité de Volobe (CGHV).
Ny zoma teo, nanao jeritodika ny fivoaran’ny tetikasa tamin’ny filohan’ny Antenimierampirenena ny ekipan’ny CGHV. Hetsika hanohizana ny dinika amin’ireo tomponandraiki-panjakana samihafa. Tao anatin’izay, nanamafy ny fanohanany amin’ny hanatanterahana ny tetikasa ny filohan’ny Antenimierampirenena. Zava-dehibe hoy izy fampandrosoana ny fotodrafitrasa momba ny angovo. Vonona hanohana ireo dingana manaraka ny Antenimierampirenena, araka ny andraikiny sy ny fahefana ananany. Anisan’ireo Andrimpanjakana midinika sy mifanakalo hevitra tsy tapaka amin’ny tetikasa Volobe ny Antenimierampirenena. Tafiditra amin’izany ny Filoha Lefitra misahana ny Faritanin’i Toamasina, ny Vaomiera misahana ny angovo ary ireo solombavambahoaka voafidy ao amin’ny Faritra Atsinanana. Tanjona ny hizara vaovao momba ny fivoaran’ny tetikasa, handraisana soso-kevitra avy amin’ireo olom-boafidy. Hanamafisana ihany koa ny fandrindrana ny lafiny ara-angovo, ara-toekarena, ara-tontolo iainana ary ara-tsosialy mifandraika amin’ny tetikasa.
Fifanakalozan-kevitra
Mbola hitohy ny dinika ataon’ny ekipan’ny CGHV amin’ireo tomponandraiki-panjakana samihafa sy ny vondrom-piarahamonina ary ireo mpisehatra rehetra voakasiky ny tetikasa. Fifanakalozan-kevitra mifototra amin’ny mangarahara sy ny fampitam-baovao tsy tapaka. Mikendry ihany koa ny handray sy hamaly ireo ahiahy sy soso-kevitra avy amin’ireo mpandray anjara. Tanjona apetraky ny tetikasa Volobe hatrany ny hanamafy ny famokarana angovo maharitra ho an’ny tombontsoam-pirenena.
Henintsoa
French