Mialoha ny handehanan’ireo solontena roa ho any Afrika, hanatanteraka lalao mandroso sy miverina, eo amin’ny Kianjan’ny CFFA Iavoloha, amin’ity volana aogositra ity, ny FC Rouge, tompon’ny amboaran’i Madagasikara sy ny CFFA, tompondakan’i Madagasikara.
Ho fanohanana sy hanomanana tsara ny fifaninanana afrikanina, “Ligue des Champions Caf” sy ny “Coupe de la conféderation”, hanatanteraka fifanandrinana mandroso sy miverina, na ny ” Coupe des champions” eny amin’ny CFFA Iavoloha, ny CFFA sy ny FC Rouge. Hetsika karakarain’ny klioba roa tonta, ary natao hiantsoana ireo mpankafy ny kitra malagasy mba hanohana sy hijery ity fihaonan’ny samy nahazo amboara ity. Ho an’ny fihaonana mandroso, hotontosaina ny alahady 23 aogositra ho avy izao. Ny 30 aogositra kosa ny fifanandrinana miverina, eny amin’ny Kianjan’ny CFFA Iavoloha. Tsy misy idiran’ny resaka “Super coupe” izy ity raha ny fanazavana nataon’ny mpikarakara, omaly. Hatramin’ny nanoratanay, tsy mbola namoaka ny vaovao mahakasika izany ny Federasiona malagasin’ny baolina kitra (FMF). Tsara marihina fa ny FC Rouge hifandona amin’ ny ekipan’ny Red Arrows Zambia, mandritra ny dingana voalohan’ny fiadiana ny amboaran’i Afrika ho an’ireo klioba. Ny CFFA kosa hifampitana amin’ny Lijabatho FC avy atsy Lesotho. Hatreto, tsy mbola fantatra ny toerana handraisan’ny Malagasy ny lalaony, saingy raha ny siosion-dresaka mandeha, mety hatao atsy Maorisy na Afrika Atsimo na Kenya izany, amin’ny fihaonana voalohany. Ampahafantarina fa ny lalao mandroson’ ireo fifanintsanana afrikanina ireo izay hotanterahina eo anelanelan’ny 4-6 septambara. Ny 11-13 septambra kosa ny lalao miverina.
Fitia Randria
French