Araka ny didim-panjakana 2026-2155, hivory tsy ara-potoana ny Antenimierampirenena hanomboka anio, eny Tsimbazaza. Miisa 17 ireo volavolan-dalàna hodinihina. Anisan’izany, ohatra, ny volavolan-dalàna 002/2026 tamin’ ny 15 janoary 2026, anaovana ny sata fiarovana ny fizaka-manana ara-indostrialy eto Madagasikara. Eo koa ny volavolan-dalàna 018/2026 tamin’ny 2 jona 2026, anomezan-dalana ny fankatoavana ny Fifanarahana findramam-bola momba ny famatsiam-bola ny Tetikasa fanitarana ny faritr’i Mangoky Ambany, Dingana II (PEPBM II), vita sonia ny 6 mey 2026, teo amin’ny Repoblikan’i Madagasikara sy ny Facilité d’appui à la transition. Toy izany koa ny volavolan-dalàna 019/2026 tamin’ny 2 jona 2026, anaovana didy amam-pitsipika momba ireo asa mifandray amin’ny lalao ara-bola sy ireo orin-draharaha misehatra amin’ny lalao. Eo ny volavolan-dalàna 028/2026 tamin’ny 10 jona 2026, anomezan-dalana ny fankatoavana ny Fifanarahana findramam-bola momba ny famatsiam-bola ny tetikasa fahaiza-manaon’ny tanora ho amin’ny fanovana ara-toekarena sy ny asa eto Madagasikara (MYSET), vita sonia ny 30 aprily 2026, teo amin’ny Repoblikan’i Madagasikara sy ny Banky iraisam-pirenena. Eo koa ny volavolan-dalàna 036/2026 tamin’ny 17 jona 2026, anomezan-dalana ny fankatoavana ny Fifanarahana findramam-bola momba ny famatsiam-bola ny tetikasa tantsoroka ho an’ny fitsarana eto Madagasikara (Pajma II), teo amin’ny Repoblikan’i Madagasikara sy ny vondron’ny Masoivoho frantsay ho fampandrosoana (AFD).
Fantatra fa haharitra 12 andro izao fivoriana tsy ara-potoana izao, izay hifarana avy hatrany raha vao vita ny fandinihana ireo lahadinika.
R. Nd.
French