Tafita hiatrika ny fiadiana ny ho tompondaka maneran-tany amin’ny taranja “Pentathlon moderne” izay hotanterahina any Portugal, ny 26 oktobra hatramin’ny 1 novambra ho avy izao, ireo atleta malagasy roa vavy, Razafimbahiny Chricyah sy Andrianantara Fahendrena. Izy mirahavavy ireo izay nisongadina nandritra ny fifaninanana afrikanina natao tany Afrika Atsimo, ny faran’ny herinandro lasa teo. Marihina fa nahazo medaly dimy, volamena 1, volafotsy 1, alimo 3, ny Malagasy tamin’izany ary i Chricyah no nahazo ny medaly volamena, teo amin’ny sokajy U9. Nandrombaka ny volafotsy teo amin’ny U13 kosa i Fahendrena. Nambaran-dRandriamalala Nathalie, filohan’ny Federation Pentathlon Moderne Malagasy, afakomaly, tetsy Ivato, fa efa hiatrika sahady ny fanomanana ireto atleta ireto ny rafitra federaly, amin’ny herinandro ho avy io.
“Efa vonona tanteraka ny ankizy hiatrika an’io fifanintsanana iraisam-pirenena io, saingy miankina amin’ny enti-manana ihany ny zavatra rehetra”, hoy ny filoha Randriamalala Nathalie. Ampahafantarina fa ny taranja Pentathlon moderne izay hikambanan’ireo taranja dimy toy ny lomano, tifitra basy “laser”, “escrime”, hazakazaka ary fitetezana sy fialana sakana “parkour d’obstacles”.
Fitia Randria
French