fanamboaran-dalana: Vita ny 70% ny vahilava Kiembe, Toliara

Tratry ny tondra-drano ma­tetika ny tanàna ao amin’ny fo­kontany Mahavatse sy Kiembe, distrika Toliara I, satria iva toerana. Mora sarona noho ny fiakaran’ny ranomasina sy ny orambe. Koa, hamafisina ny vahilava Kiembe efa misy, mirefy 1,8 km, mandalo ny seranan-tsambon’i Toliara (PK 2 +400) sady hitarina ho 5 km, mampifandray amin’ny lalam-pirenena RN7 (RN7 (PK 4 +927), any amin’ny seranam-piaramanidina Toliara. Endrika lalambe vita godirao manana sakany 7 m no atao, ilay antsoina hoe « voie rapide ». Nijery ifotony ny fizotry ny asa ny dele­gasiona, notahirin’ny minisitry ny Asa Vaventy (MTP), Rafidison Richard Théodore, ny faran’ny herinandro teo.
Hita fa efa vita hatrany amin’ny 70% ny asa. Manatante­raka azy ny orinasa sinoa CCOD (China State Construc­tion Overseas De­velopment), mandritra ny 16 volana. Maha­ritra 29 volana kosa ny fanaraha-maso ataon’ny orinasa Técnica Y Proyec­tos S.A (TYPSA).
Hamaha ny olan’ny fitohanan’ny fifamoivoizana ao Toliara ity fotodrafitrasa goavana ity. Mitentina 40 tapitrisa euros ny asa, findramam-bola tamin’ny Banky eoropeana ho an’ny fampiasam-bola (BEI), araka ny fifanarahana tamin’ny jona 2016. Misy koa ny fandraisana anjaran’ny fanjakana ma­lagasy amin’ny alalan’ny minisiteran’ny Toekarena sy ny fitantanam-bola (MEF).

Njaka A.