Nanatanteraka fivoriana maika tetsy Isoraka ny Federasionina malagasin’ny baolina kitra sy ireo mpitsara ary ny mpiantsehatra amin’ny fifaninanana “PFL”, ny asabotsy lasa teo. Antony: tsy nety hitsara ny lalao ny mpitsara manoloana ireny zava-nitranga nahitana fitoriana mpitsara ireny. Raha ny filazan’ny loharanom-baovao iray, efa niravona ny disadisa, saingy hahemotra avokoa ny fihaonana ampahefa-dalana miverina ho an’ireo klioba enina ambiny. Ho an’ny Elgeco Plus manokana, tompondaka farany, hatao ny 28 mey ho avy izao, eny By-Pass, ny fifanandrinana faharoa eo aminy sy ny FC Rouge. Mbola manala vela ny Elgeco Plus, izay niondrika tamin’ny isa 1 no ho 0, tany amin’ny lalao mandroso.
Ekipa voalohany
Notontosaina tamin’ny asabotsy, tany amin’ny Kianjan’ny Vélodrome Antsirabe, ny lalao miverina izay nifanandrinan’ny Disciples FC Vakinankaratra sy ny Fosa Juniors Boeny. Nivoaka ho mpandresy, tamin’ny isa 1 no ho 0, tamin’izany, ny Disciples FC. Ity farany izany no ekipa voalohany tafita hiatrika ny dingan’ny manasa-dalana ho an’ny fifaninanam-pirenena “Pureplay Football League (PFL)”.
Efa lavon’ny Disciples tamin’ny isa 4 no ho 0, ny Fosa Juniors FC nandritra ny lalao mandroso. Raha hiverenana ny fihaonana tany Antsirabe, somary nosahiranin’ny Fosa ny mpilalaon-dRazafindrakoto Mamisoa, mpanazatra ny Disciples FC. Efa tany amin’ny minitra (faha-90+6 min) vao nahakobana harato i Tendry, lohalaharan-dry zareo Vakinankaratra. Maro ny baolina tokony ho tafiditra ho an-dry Fely, Bono, Fabrice, ho an’ny Disciples, saingy nalain’i Tony, mpiandry tsatoby an’ny Fosa, izany.
Fitia Randria
French