Tamin’ity herinandro ity, nitokana ny sekoly faha-250 naoriny ny Fondation Axian, tao amin’ny EPP Ambahikily, ao Morombe. Fiaraha-miasa amin’ny United World School (UWS) no nahavitana ny efitrano fianarana telo ho an’ny ambaratonga fototra sy efitrano telo ho an’ny garabola. Misy trano fidiovana, toerana fanasan-tanana ary kianja filalaovana koa ao. Trano telo efa nisy tao amin’ny sekoly ihany koa no nohavaozina.
Mandray mpianatra hatramin’ny 1 500 ny EPP Ambahikily amin’izao taom-pianarana vaovao izao, ao anatin’ ny tontolo azo antoka kokoa, ampy fitaovana ary mifanaraka kokoa amin’ny filan’izy ireo. 27 ireo mpampianatra mampihodina ny sekoly.
Niara-niasa an-taona maro tamin’ny UWS ny Fondation Axian, izay mpiara-miombon’ antoka maharitra ao amin’ny faritra Atsimo Andrefana. Efa manodidina ny 30 ireo sekoly niaraha-naorina.
Tamin’izany koa no nanokafan’ny UWS ivontoerana fanamafisana ny fahaiza-manao arakasa ho an’ny mpampianatra ao amin’ny Faritra. Solosaina nomen’ny Yas Madagascar no ampiasaina ao, ho fanohanana ny fanofanana sy fampivoarana ny fahaizan’ireo mpampianatra.
Nametrahana ny vato fototry ny kianja multisport koa ao amin’ny EPP Ambahikily. Tafiditra ao anatin’ny fandaharanasa “M’Hetsika MVola”, izay manamafy fa tsy voafetra ao an-dakilasy irery ny fanabeazana, fa ilaina ny fanatanjahantena, ny fialamboly ary ny fampivelarana ny ankizy.
Tatiana A
French