Nitondra fanazavana teny Ambohijatovo, omaly, ny eo anivon’ny minisiteran’ny Tanora sy ny fanatanjahantena (MJS) mahakasika an’ireny vaovao miely mahakasika ny karaman’ny mpanazatra Barea, Corentin Martins ireny. Nilaza izy ireo fa nisy tokoa ny fahatarana ny fandoavana ny karaman’ity mpanazatra ity, saingy tsy feno ilay vaovao miely. Nambaran’ny sekretera jeneralin’ny MJS, Gaspard Brice Harliva, fa efa nisy ny didy nivoaka teo anivon’ny filankevitry ny minisitra hamoahana an’io vola io ka afaka andro vitsy dia handray ny karamany i Corentin Martins, miaraka amin’ny “prime” an’ireo mpilalao tsy mbola voaloa, nanomboka ny volana marsa 2026 lasa teo.
Nomarihiny fa anisan’ny antony nahatara an’ity fandoavana ny karama ity ny fahataran’ny fanaovan-tsonia vaovao, izay tsy vita ny 21 febroary lasa teo noho ny fisian’ireo fepetra vitsy mbola tsy neken’ity Frantsay teknisianina ity. “Efa roa volana mahery taty aoriana vao vita io sonia io, ka tara vao nanomboka ny dingana rehetra ara-panjakana. Marihina fa sarotsarotra ary betsaka ny dingana tsy maintsy arahina rehefa mamoaka volam-panjakana”, hoy ihany izy ireo.
Fitia Randria
French