Sarotra ho an’ny Fosa Jr ny lalao nihaonany tamin’ny Cosfa, amin’ny fifaninanana “Orange Pro League”. Resy tamin’ny isa 3 no ho 1 izy ireo. Tsy anisan’ireo mpilalao nalahatra voalohany i Dax, mpilalao Fosa Junior.
Tsy nampoizin’ny rehetra ny vokatra omaly. Resin’ ny Cosfa Analamanga tamin’ny isa 3 no ho 1 ny Fosa Junior FC Boeny. Lalao notanterahina teny Vontovorona. Fihaonana tafiditra amin’ ny andro fahafito amin’ny fifaninanana “Orange Pro League 2023”. Samy ao anatin’ny kaonferansy avaratra ny roa tonta.
Ny ekipan’ny miaramila no nitarika tamin’ny isa 2 no ho 0 teo amin’ny fizaram-potoana voalohany. Baolina tafiditr’i Ruffin teo amin’ny minitra faha-38 sy i Toky, minitra faha-45. Niezaka nanohitra ihany ry Drogba sy ny namany saingy hita fa matanjaka ny miaramila. Araka izany, nampian’i Tojo ny isa ho an’ny Cosfa, telo minitra tsy hifaranan’ny lalao (87 min). Taitra tamin’ny torimasony ny Fosa Jr ka tafiditr’i Fely ny baolina tokana ho an’ny Fosa Jr, teo amin’ny fotoana fanampiny (90+1 min).
Mbola eo amin’ny laharana voalohany hatrany ny Fosa Junior, manana isa 18. Niampy telo ny isan’ny Cosfa, manana isa 14. Eo amin’ny laharana faharoa no misy azy ireo. Tsiahivina fa ity lalao nihaonan’ny Fosa tamin’ny Cosfa ity no faharesena azon’ity ekipa avy any Boeny ity voalohany.
Rava sahala ny CFFA sy Elgeco
Ady sahala tsy misy nitoko ny isa nentin’ny CFFA Andoharanofotsy sy ny Elgeco Plus Analamanga nisarahana nandritra ny andro fahafiton’ny fifaninanana “Orange Pro League 2023”. Lalao notanterahina, omaly, teny amin’ny kianjan’ny Elgeco Plus, By-pass. Niady tanteraka ny lalao. Maro ny fanafihana nataon-dry Carlos, mpilalao CFFA saingy nalain’i Nina, mpiandry haraton’ny Elgeco. Nisy ny fanafihana izay novokarin’ i Doddy sy Onja, saingy nohidin-dry Dadafara, vodilaharana CFFA ny lalan’izy ireo.
Fitia (Mpianatra asa)
Kaonferansy avaratra
Uscafoot (2) vs Tia Kitra (0)
Fosa Jr (1) vs Cosfa (3)
As Fanalamanga (2) vs TFFC (0)
Kaonferansy atsimo
Zanakala FC (2) vs (0) Jet Kintana FC
Mama FC (1) vs (0) Dato FC
CFFA (0) vs (0) Elgeco
3 FB Toliara vs Disciples FC ( Nahemotra ny 5 avrily)
French