Nitondra fanazavana momba ireo vondrona na vovonana, toy ny FFM sy ny VFM ny filoham-panjakana, ny Kly Randrianirina Michaël. Nambarany fa tsy manery olona hanohana ny tenany izy. « Izaho koa anefa tsy manakana ireo vonona hanohana ahy », hoy izy tany Brickaville, ny herinandro teo.
Hentitra ny Praiminisitra, Rajaonarison Mamitiana. « Aleo miala izay tsy mahasahy », hoy izy. Nanteriny fa tsy tokony hananan-kavana ny resaka kolikoly, araka ny nambarany nanoloana ireo sekretera jeneralin’ny minisitera, ireo tale jeneraly ary ireo tale sy tomponandraikitra misahana ny ady amin’ny kolikoly eny anivon’ny minisitera isanisany.
Nolavin’ny Fitsarana tampony « Bail and Remand Court » atsy Maorisy ny fangatahana fahafahana vonjimaika nataon’ilay mpandraharaha, Ravatomanga Mamy. Anisan’ny anton’izany ny mety hisian’ny fandosirana sy ny mety haneritereny ireo vavolombelona raha toa ka mivoaka ny tenany. Eo koa ny vesatra hiampangana azy.
Nohavaozina ny fikarakarana Pasipaoro. Atao amin’ny alalan’ny tranokala “e-Pasipaoro” ny fikarakarana ny fangatahana azy ary hampiharina tsy ho ela. Voalaza fa efa eo amin’ny dingana andrana ireo teknisianina amin’izao. Hampihena ny fotoana lany sy hanamora ny fikarakarana pasipaoro ihany koa ny fampiasana ity paikady vaovao ity.
French