Nosafidiana manokana ny lohahevitra « Atsahatra ny fampanambadiana ny ankizy fa andao hanohana ny zon’ny zatovovavy” nandritra ny fanamarihana ny Andro iraisam-pirenena ho an’ny zatovovavy, ny faran’ny herinandro teo.
Anisan’ny endrika iray mahazo vahana isehoan’ny tsy fanajana ny zon’ny ankizivavy ny fampanambadiana azy satria manohintohina ny fanabeazana sy ny fahasalamany ary ny hoaviny iray manontolo. Voalazan’ ny valin’ny fanadihadiana momba ny toe-piainan’ny ankohohana eto Madagasikara (MICS) ny taona 2025, fa mampanahy ny zava-misy eto amintsika. Niakatra ho 42% ny tahan’ ny tovovavy 20 ka hatramin’ny 24 taona niroso amin’ny fanambadiana mialoha ny faha-18 taonany, raha 40% izany ny taona 2018. Any amin’ny faritra Atsimo Atsinanana, mahatratra 57,6% ny taha. Toy izany koa ny amin’ ny faritra Melaky, 57,4%. Vokatr’izay, zatovovavy iray amin’ny telo no mitondra vohoka aloha loatra satria 38% amin’izy ireo (15 taona-19 taona) no miditra amin’ny firaisana ara-nofo ary mifandraika amin’ny fitondrana vohoka na koa eo am-piterahana ny 15% ny famoizana aina eo amin’ny ankizivavy.
Efa nisy haitaky
Efa nisy haitaky nataon’ny rafitra maromaro tamin’ny fiandohan’ity volana ity. Nahitana ny UNFPA sy ny Unicef, ny minisiteran’ny Mponina sy ny firaisankina sy ny parlemantera izany. Hanitsiana
ny andinin-dalàna (article 3) amin’ny lalàna n°2007-022 momba ny fanambadiana manambara ny fanekena ny firosoan’ny olona latsaky ny 18 taona amin’ny fanambadiana raha misy antony lehibe ny votoatiny.
Hanovana ny zava-misy, zava-dehibe ny manohana ny fanabeazana ny zatovovavy. Satria ny renim-pianakaviana nandia fianarana no afaka mitondra fivoarana eo anivon’ ny ankohonany momba ny fahasalamana, fanabeazana… Tafakatra 94% ny tahan’ny fidirana eny amin’ny ambaratonga voalohany rehefa nahavita fianarana hatramin’ ny kilasy T9 ilay renim-pianakaviana. 57% ny taha rehefa tsy nandia sekoly na nijanona teo amin’ny ambaratonga voalohany ilay reny, araka ny tatitry ny MICS Madagascar 2025 ihany.
Vonjy
French